KALIBO, AKLAN—Nakasueod eon sa Western Visayas do ap-at nga variants it coronavirus disease 2019 (COVID-19).
Suno sa Department of Health 6, raya hay ru Alpha, Beta, Delta, ag Theta (P.3) variant ag sa makarun hay may una nga 28 kumpirmadong kaso it Alpha variant sa rehiyon kung siin 24 kara hay mga local cases.
Sa nasambit nga numero, 11 kara hay halin sa Iloilo Province, pito sa Antique, lima sa Guimaras, ag sambilog sa Negros Occidental samtang may una man nga nailistang 29 nga kaso it Beta (B.1.351) variant apang 23 eang sa mga raya do verified kaibahan do 13 sa Iloilo province, Guimaras nga may apat, daywa sa Aklan, ag tag-sambilog sa Antique, Capiz, Negros Occidental ag Iloilo City.
Do Delta variant man hay do mag-asawa sa Pandan, Antique do nailistang kumpirmadong kaso ag siyam do natukiban nga kaso it Theta variant sa Region 6 nga ginaeakipan it tatlo halin sa Negros Occidental, daywa sa Aklan ag tag-sambilog sa Iloilo Province ag Iloilo City.
Sa pihak nga parte, sa ginpatigayon nga “town hall session” kaibahan do mga local media, ginpahayag ni Dr. Alethea De Guzman, OIC it Epidemiology Bureau it DOH nga do andang ginatutukan it mayad hay do Delta variant nga mas makataeapon. // SHERRY ANNE REUNIR-VIDAL