Apat pang dialysis machine nakatakdang dumating sa CNPH

CAMARINES NORTE- Inanunsiyo ni Governor Edgardo Tallado nitong Lunes na may parating na apat na karagdagang dialysis machine sa Camarines Norte Provincial Hospital (CNPH).

Ayon kay Tallado, sa ngayon ay mayroong limang dialysis machine sa naturang pagamutan at liban pa sa paparating na apat ay bibili pa umano ng anim ang Pamahalaang Panlalawigan.

Dahil dito magiging 15 na ang dialysis machine sa CNPH na malaking tulong umano lalo na sa mga mahihirap.

Hindi raw kasi biro ang gastos sa pagpapa dialysis sa mga pribadong health facility kaya’t kung meron nito sa CNPH ay malaking tulong sa mga mahihirap na minimal na halaga lang ang babayaran at posible nga umanong ma- avail pa ng libre.

Sa susunod na taon ay malaki na rin umano ang pagbabago ng CNPH dahil sa nagpapatuloy na expansion ng mga gusali.

Mababatid na sabay- sabay ang construction ng mga ospital sa lalawigan tulad sa bayan ng Sta Elena, Labo District Hospital sa Labo, Capalonga Medicare and Community Hospital at CNPH.

Leave a Reply

Your email address will not be published. Required fields are marked *