BAG-ONG KORONADAL CITY PUBLIC MARKET TUKURON SULOD SA DUHA KA TUIG – MAYOR OGENA

GUSTO gilayun ni Koronadal City Mayor Eliordo “Bebot” Ogena nga masugdan ang pagpatukod sa 4-storey building nga palengke.

Kini ang gibutyag sa mayor nga may budget nga P300 million ang palengke nga loan nila sa bangko apan giangkon nga kulang pa kini alang sa multi level parking area.

Sa karon anaa pa sa build and design ug gikordon na ang portion sa palengke aron masugdan na ang pagtukod niini sa usa ka ektarya kapin nga luna.

Upat ka andana ang maong palengke, asa ang first floor ang gikahimutangan sa karnehan, isdaan, gulayan ug dry goods, samtang ang second floor maoy food court.

Samtang gitino usab sa mayor nga ang interest sa loan ang ilang bayran sa higayon nga ma-turn over na sa LGU ang palengke nga nahimutang duol sa old city hall.

Pinakadugay na matud pa ang duha ka tuig nga mahuman ang proyekto nga usa ka economic enterprise ug gusto nga himuong makadani sa mga katawhan ang palengke ug sa kasikbit nga mga lugar.

Dungan sa pagpatukod sa bag-ong palengke ang pag-rehabilitate sa creek aron himuong maanindot nga mini park.