Gilusad sa lokal nga pagamhanan sa syudad sa Cagayan de Oro ang ‘CDO PinasLakas Special Vaccination Days – Bakunahang Bayan’ sa Puntod covered court, Kagahapong adlawa, Septiyembre 26 ning tuiga.
Kini gipanguluhan ni Cagayan de Oro City Mayor Rolando Uy ug Department of Health Region 10.
Ang ‘Bakunahang Bayan’ o nationwide COVID-19 vaccination and booster campaign molungtad sugod Septiyembre 26 ngadto 30 ning tuiga sa nagkadaiyang mga vaccination centers nga gidumala sa syudad, ingon man sa DOH region 10.
Atol sa launching ceremony, gihingusgan ni City Health Officer Dr. Rachel Daba-Dilla, nga dili angay kahadlokan ang unsa man nga klase nga bakuna, lakip na ang bakuna batok COVID-19.
Gani, dugang pa ni Dr. Dilla daghan na nga mga sakit ang nasumpo sa pagkuyanap tungod sa lapad nga pagpamakuna.
Sama na lang sa sakit nga tuberculosis, measles, flu, typhoid, cholera, small pox, polio ug uban pa.
Gibutyag usab ni Dr. Ina Grace Chiu, medical coordinator sa National Immunization Program sa CHO, nga kapin lima ka libo pa ka mga senior citizens sa syudad ang target mahatagan og second doses atol sa Bakunahang Bayan.
Misalmot usab sa aktibidad si DOH 10 Regional Director Dr. Jose R. Llacuna Jr. nga gipunting ang importansya sa COVID-19 vaccines aron malikay sa ‘severe symptoms’ hinungdan sa kamatayon kon ugaling matakboyan sa COVID. END