Balay nga giguba sa kusog nga balud, nahugno; pamilya nangayo og tabang   

General Santos City- GAMAY nga agianan, buslot nga salog, guba nga bungbong ug nagkatag nga mga gamit mao kini ang hulagway sa gipuy-ang balay sa mag-asawang Emilio ug Myrna Malazarte sa Zone 6, Barangay Bula, GenSan.

Giigo matud pa sa kusog nga balud ang ilang pinuy-anan atol sa kusog nga hangin kaniadtong nakalabayng semana bulan sa Oktubre. Kauban sa mag-asawa nga nagpuyo ang ilang mga anak ug unom ka apo.

Delikado ang lugar tungod sa ilalom niini ang lalom nga tubig dagat.

Matud ni Emilio nakaundang siya og trabaho ug kasamtangan gibantayan niini ang gagmay niya nga mga apo samtang nagapanarbaho isip tigbantay og tindahan sa merkado ang iyang asawa nga si Myrna.

Ang ilang 13-anyos anak nga lalaki nagatabang sa pagbaligya og gulay sa tindahan nga naa gawas sa ilang balay.

Nidool matud pa kini sa Barangay apan wala silay nadawat nga tabang.

Tungod sa lisod nga sitwasyon nangayo og tabang ang pamilya aron maplastar ang ilang pinuy-anan. Nanawagan kini sa mga tawo nga dunay malumong kasing-kasing nga modonar og mga materyales sama sa kahoy aron siya na ang mag-ayo sa ilang balay.

Dugay na matud pa silang nagpuyo sa lugar ug wala na silay laing mabalhinan. Boot niining mahan-ay ang ilang pinuy-anan aron makatulog sila og tarung ilabi na ang gagmay nga mga apo. Naglaom ang pamilyang Malazarte nga dunay makatabang kanila taliwala sa lisod nga kahimtang sa ilang pagpuyo.

Leave a Reply

Your email address will not be published. Required fields are marked *