Partially burned ang isa ka balay matapos nasunog sa Sitio Proper Ilaya, Barangay Atiplo, Mambusao, Capiz pasado alas 11:00 sang udto kahapon sang Miyerkules, Setyembre 13.
Ginkilala ang tag-iya sang balay kay Penicula Luz, 80-anyos.
Sandig sa imbestigasyon sang Mambusao Fire Station, nagakatulog ang mag-asawa nga naga-istar sa amo nga balay nga sanday Ellen Joy Moreno, 25-anyos kag Bernard Villibert, 38-anyos sang natabo ang sunog.
Nabugtawan nalang ang mga ini nga nagadaba-daba na ang kusina sang balay nga human sa mixed materials.
Madasig ang mga ini nga nagpanawag sang bumbero kag gilayon man nga ginrespondehan.
Gindeklara nga fire-out alas 11:13 kag ginabanta nagalab-ot sa P3,500 ang nangin kahalitan sang sunog.
Sa karon, nagapadayon pa ang imbestigasyon sang Mambusao BFP agud matumod ang gintunaan sang kalayo. | Judy Ann Juare