Balay sa mga close contact sa nagpositibo sa COVID-19, gibutangan ug caution tape

GIPANGBUTANGAN sa mga caution tapes sa mga personahe sa Ozamiz City Health Office, uban sa mga kooperatiba sa lokal nga kapulisan, ang mga ganghaan o pultahan sa mga panimalay sa mga close contacts sa nagpositibo sa Covid-19.

Kini base sa mandato ni Mayor Ando Oaminal sa City Address niini kalabot sa Covid-19 situation sa Ozamiz City.

Gipasabot ni Mayor Ando nga gihimo kini aron malikayan ang paggawas-gawas sa naka-quarantine nga mga residente, nga moresulta pa unya sa pagkuyanap Covid-19.

Giawhag usab publiko sa pagtaho gilayon sa kapulisan o sa mga opisyal sa barangay o mamahimong motawag sa Covid hotlines.

Sa mga quarantine violators ug sa mga nagsupak sa health protocols, adunay ipahamtangan nga silot, base sa gipatuman nga ordinansa sa dakbayan, nga naglakip sa pagkapreso, ug base sa desisyon nga ipatuman sa korte.

Gawas sa pula nga caution tape nga may nakatatak nga DANGER, ipapilit usab sa entrance sa maong balay ang usa ka papel nga nagtala sa petsa kung kanus-a kutob ang quarantine sa maong mga indibidwal.

Basi sa guidelines sa Department of Health, nga ipailalom sa 14-day quarantine ang mga close contacts sa usa ka Covid-19 patient, nga dili na magkinanglan ug testing.

May gitagana usab nga ayuda ang LGU-Ozamiz sa mga pamilya sa maong pasyente.

Sugod Mayo 1, 2021, aduna nay kapin sa 100 households sa dakbayan ang gipailalom sa quarantine.

Samtang mokabat na sa 33 ka mga panimalay dinhi sa dakbayan Ozamis ang nabutangan sa caution tapes.