Nataban gid sang wala makilala nga kawatan ang isa ka travel bag nga naga-unod sang mga alahas matapos ginsulod sini ang balay sang negosyante sa San Antonio Sub., Brgy. Baybay, Roxas City.
Ginkilala ang tag-iya sang balay kay Aries Castro, 46-anyos residente sang nasambit nga lugar.
Sandig sa Roxas Component City Police station, takna alas 9:00 kahapon sang Miyerkules, nakabaton sila sang tawag gikan sa isa ka security guard sang amo nga subdivision nga may yara sang natabo nga kinawatay sa lugar.
Suno sa duha ka caretakers sang balay nga sanday Grace Almieda, 40-anyos kag Dean Dela Cruz, 34-anyos lunsay residente sang Brgy. Dayao, ila ginpahayag nga sang nag-abot sila sa balay ni Castro nga yara sa karon sa luwas sang pungsod, ila nakita nga nagalapta na ang mga gamit sini sa sulod sang balay.
Ginapatihan nga didto nag-agi ang kawatan sa nalikod nga pertahan sa bahin sang kusina matapos ini nga gin-guba kag ginbringka man ang pertahan sa storage room kun sa diin nahamtang ang travel bag nga naga-unod sang nagkalain-lain nga alahas kag nagabalor tanan sang P40,000.
Nagsulod pa ang suspek/mga suspek sa kwarto sang biktima kag ginpaukay ang mga kagamitan apang wala na sila sang nakuha. Sa karon, padayon ang imbestigasyon sang Roxas City PNP sa nasambit nga hitabo agud matumod ang may kahimuan sang krimen. | Judy ann Juare