Balay sang senior citizen ginsulod sang kawatan; P15,000 nga kwarta nataban!

Nataban sang kawatan ang P15,000 nga kwarta sang isa ka senior citizen matapos ginsulod sini ang iya puluy-an sa Brgy. Pangabuan, Jamindan, Capiz takna alas 3:00PM kahapon sang Miyerkules.

Ginkilala ang biktima kay Norma Hinalan, 68-anyos samtang ang suspek amo si Ernesto Inaudito, 40-anyos, isa ka ex-convict kag residente man sang nasambit nga lugar.

Sandig sa impormasyon nagikan sa Jamindan Municipal Police Station, nagpadulong sa ila istasyon si Hinalan agud ipabalhag ang natabo nga pagpangawat sa iya puluy-an.

Suno sa ginpabalhag sang biktima, nagapanglaba siya sa guwa sang iya balay sang hinali nag-abot ang suspek kag gintanyagan siya sang itlog nga ginabaligya sini, nagsabat ang biktima nga indi apang nagapamilit ang suspek nga baklan siya.

Ginapahayag nga ginhatagan sang biktima ang suspek sang P100 kag ginsilingan nga maglakat na kag indi na siya pag-isturbuhon.

Nakaligad ang pila ka minutos, nakatapos na panglaba ang biktima, iya nabatyagan nga may yara sang tawo sa sulod sang iya balay, madasig niya ini nga gintsekyar kag nakita niya ang iya bag nga nagaduag itom nga bukas na kag wala na ang iya kwarta nga nagabalor sang P15,000.

Bangud sini, madasig siya nagpadulong sa likod nga porsyon sang iya balay kag didto niya nakita si Inaudito nga nagalakat sa uyapad kag nagpalagyo sa indi mahibaluan nga direksiyon.

Nagpatigayon sang hot pursuit operation ang mga kapulisan kag natigayon nga madakpan ang suspek pinaagi man sa bulig sang mga Barangay Officials kag Barangay Tanod.

Narekober sa posisyon kag paghinakop ni Inaudito ang P6,100 nga kwarta.

Sa karon, yara na ini sa kustodiya sang Jamindan PNP para sa nagakaigo nga disposisyon kag natalana nga pasakaan sang nagakaigo nga panumbungon. | Judy Ann Juare