Napasakaan na sang kaso nga paglapas sa Republic Act 9165 ukon Comprehensive Dangerous Drugs Act of 2002 kag reckless driving and disobedience to the agents of authority ang isa ka lalaki nga bangag sa Sitio Tagudtud, Brgy. Dapdapan, Sapian, Capiz
Ginkilala ang nadakpan kay alyas “Toto”, 31-anyos residente sang New Road, Banica, Roxas City.
Matandaan nga nagapagiwang-giwang sang motorsiklo ang suspek kag nagapang-agaw na sang linya sa dalan rason nga ginreport ini sang mga pumuluyo sa kapulisan sa kahadlok nga makabunggo ini sang iban nga tawo.
Ginapahayag nga wala sa kaugalingon ang suspek sang ini ang ginrespondehan sang kapulisan kag gintuad sini nga may ginasundan siya nga spaceship rason nga nagatanga ini sa langit samtang nagamaneho sang motorsiklo.
Narekober sa iya paghinakop ang 1 piece heat sealed transparent plastic sachet sang ginasuspetsahan shabu, 4 pieces of small empty plastic sachet, twenty-eight (28) pieces sang crumpled aluminum foil, 2 pieces improvised lighter, 1 roll aluminum foil, 1 piece lighter, 1 Jansport backpack color blue kag 1 unit color black Suzuki Raider nga motorsiklo.
Sa karon, nagapabilin sa kustodiya sang Sapian PNP ang suspetsado kag natalana nga pasakaan sang nagakaigo nga panumbungon. | Judy Ann Juare