LEGAZPI CITY – Mas pakukusugon na ngunyan kan Department of Agriculture (DA) Bicol an saindang regular na ‘Bantay Presyo’ sa mga produkto orog na sa mga bagas.
Sa intrevista kan Brigada News FM Legazpi kay DA Bicol Regional Spokesperson Lovella Guarin, pigkumpirmar niya na dai na ninda gigibuhon na weekly an bantay presyo, kundi urualdaw na.
Segun saiya, igwa sana sinda nin regulatory asin visitorial na poder susog sa mga executive orders na ipinaluluwas.
Huli kaini, dae ninda kapot an pagdakop sa siisay man na mabalgar sa kakaimplementar pa sanang price ceiling sa mga bagas.
An PNP kaya an pinakang may poder nganing sinda dakupon asin magsangat nin magkakanigong penalidad.
Segun pa kay Guarin, masumiter sana sinda nin reports kaini sa Office of the Senior Undersecretary asin ini na an maguno nganing i-sumiter sa PNP.
Mientrastanto, an saindang opisina uurualdawon an pagbisita sa mga merkado nganing personal nindang mahiling an sitwasyon kan mga ini sa pagpapabakal.