Preparado na ang bug-os nga banwa sang Dao sa pagselebrar sang Pasalamat Festival 2023 nga magaumpisa sa Setyembre 14 tubtob 22 sini nga tuig.
Ini ang ginpahayag ni SB Member Kathylyn “Jhaja” Bauson Fuentes sang ma-interview sang Brigada News FM Roxas City.
Suno kay Fuentes, may pagahiwaton nga Opening Salvo sa Setyembre 14 kaupod ang nagakalainlain nga sektor sang banwa kag may yara man sang LGU Night sa kapareho nga adlaw.
Sa Setyembre 19, pagahiwaton naman ang Mass Wedding kun sa diin 24 ka mga couples ang pagakaslon sa Santo Tomas de Villanova kag sabat naman sang banwa ang ila reception.
Dugang pa ni Fuentes, ila ginapabugal ang branding sang Miss Dao nga may titulo nga ‘Hiyas sang Dao 2023’ kun sa diin walo ka mga kandidata ang magapaindis-indis.
Madamo pa suno sa SB Member nga mga aktibidades ang pagalauman lakip na diri ang photo art exhibit, fun run, kag Maragtas Cultural Show.
Magatambong ang pila ka mga rising and famous personalities nga si Bugoy Carino, PBB Season 10 Former Housemate Dustine Mayores, Taylor Sheesh kag pila nga mga local bands.
Nahibaluan, nga sang nagligad nga Setyembre 10, ginlunsar sang nasambit nga banwa ang ila official theme song nga may titulo nga “Pasalamat sa Dao” nga gincomposed ni Gino Buizon.
Gina-imbetar naman ni Fuentes ang mga pumulyo sang mga kalapit nga banwa nga magpasakop ukon saksihan ang piyesta nga ila pagahiwaton. | Frances Preciosa