Nagsaka na sa tatlo ka kabanwahanan ang nagpositibo sa African Swine Fever sa probinsya sang Capiz.
Ini ang Barangay Canapian sang Maayon, Poblacion Ilawod sang Dumarao kag ang Barangay San. Antonio sa banwa sang Pilar.
Sandig kay Dr. Leonel Abordo, Provincial Veterinarian, nakabaton ang ahensya sang report nga may yara sang nagapangluya nga baboy, gani gilayon nga ginpadulongan sang surveillance team agud tun-an ang nagakahinabo kag nagkuha sang tatlo ka blood samples kun sa diin ang isa diri ang nagpositibo sa ASF.
Bangud sini, madamo nga mga lugar ang naapektuhan apang gintuad ni Abordo nga masarangan sang ahensya nga makontrol kag indi macontaminate ang mga kaiping nga banwa.
Nagapasalamat man si Abordo sa kooperasyon sang mga pumuluyo nga wala nagaduha-duha nga e-dispose ang ila baboy agud indi maapektuhan sang ASF.
Ginrekomendar man sini, nga sa tion nga makit-an nga pagpangluya ang sapat, katayon na ini gilayon kag kaunon apang siguradohon nga indi na makalab-ot pa sa iban nga lugar.
Ginklaro man sini nga ang pagkaon sang baboy nga apektado sang ASF ang indi makatuga sang malain nga epekto sa ikaayong lawas sang tawo gani safe gid ini kaunon. | Judy Ann Juare