Magapasar sang resolusyon ang pamunuan sang Barangay Cogon natuhoy sa karsada nga ginakuha sang pamilya Cerilos bangud ginapahayag ila ini duta.
Sa interview sang Brigada News FM Roxas City kay Kapitan Reynaldo Alparaque, ginpahayag sini nga nagpatigayon sila sang sinapol kaupod ang iya konseho kag ila ginkasugtan nga magapasar sang resolusyon agud nga matapos na ang problema sa duta nga ginhimo karsada sang mga pumuluyo nga ginakuha naman sang tag-iya nga si Lolito Cerilos.
Luyag ni Alparaque nga ipaabot kay Mayor Ronnie Dadivas ang ini nga problema agud nga mahatagan sang aksyon kag maklaro ang tanan.
Dugang pa sang kapitan nga nagpa-blotter na siya sa Roxas City PNP bangud ginapahayag nga ginmulay siya ni Cerilos kag kasubong wala siya ginrespeto bilang kapitan sang barangay.
Matandaan sang damlag lang, nag-angkon sang mainit nga argumento sanday Cerilos kag Alparaque, matapos nga ginbawalan sang kapitan ang tag-iya nga magpanukot sang P10 sa mga nagalabay nga motorista sa amo nga karsada.
Ginpanindugan naman sang tag-iya nga may kinamatarong siya bangud may titulo sila nga ginahawiran kag handa ini nga atubangon ang bisan sin-o nga nagasita sa iya. Natalana naman nga mag-atubangay ang magtimbang nga bahin. | Judy Ann Juare