Arestado ang isa ka Barangay Kagawad kag isa ka Tanod matapos gin-implementaran sa search warrant sang mga kapulisan sa Brgy. Dapdapan, Sapian, Capiz.
Ginkilala ang mga naaresto nga sanday Vergilio Peralta, 58-anyos, isa ka Barangay Kagawad kag Octavio Salas, 48-anyos, isa ka tanod lunsay mga residente sang nasambit nga barangay.
Narekober sa paghinakop ni Peralta ang 1 unit .45 calibre nga armas-luthang, 1 magazine, 5 ka live ammunition kag 1 black wholester sang nasambit nga armas.
Samtang nakuha naman sa paghinakop ni Salas ang 1 unit .38 caliber nga armas luthang, 3 ka live ammunition sang .38, 3 live super 32, 3 live ammunition sang super 38, 1 ka homemade rebolber, 1 homemade shotgun, 1 live ammunition sang 12gauge shotgun, 5 ka bala sang .45, kag 1 ka bala sang .38 caliber nga armas-luthang.
Ang search warrant ang gin-isyu kag ginpapanaog ni Judge Judeth Orendaen Tunugbanua, RTC, Branch 20, Mambusao, Capiz napetsahan July 3, 2023
Sa karon, yara na sa kustodiya sang Sapian PNP ang mga suspetsado kag natalana nga pasakaan sang kaso nga paglapas sa RA 10591 ukon “Comprehensive Firearms and Ammunition Regulation Act.”