Luwas og anaa na sa maayong kahimtang karon ang mga Barangay Kagawad og kauban niini nga gikidnap sa Brgy. Kimlawis alas 8:11 sa buntag kagahapong adlawa, Oktubre 8, 2021.
Giila ang kagawad sa nasangpit nga barangay nga si Barangay Kagawad Nilo Ehjoc Duazo alyas “Lek Lek” ug kauban niining si Salvador Caliano Gilio alyas “Bador” nga matud pa nang-harvest lamang og saging alas 2:00 sa hapon niadtong Septyembre 16, 2021.
Sumala pa ni Police Col. Giusseppe Geralde, officer -in- charge sa DSPPO gusto matud pa sa suspek nga buhian ang ilang sub-leader nga si Danilo Masday alyas “Dan” ug Sori Cansing nga nasikop sa kapolisan sa kasong kidnapping, pagpananaom og marijuana, ug kasong murder hinungdan nga nahitabo ang pagpangdagit.
Nagbinayloay usa og mga bala ang mga otoridad batok sa grupo sa mga bandido nga gipamunuan nila Lolong Cansing ug Boyet Dialang apan daling nisibat ang mga suspek padulong sa bukirang parte sa Sitio Samyol Palak og didto nabiyaan ang mga biktima inubanan ang armas nga .22 gauge long firearm ug mga bala sa armas.
Kahibaloan nga ang Critical Incident Management Task Group nga gilangkuban sa nagkadaiyang yunit sa DSPPO, Criminal Investigation and Detection Group ug 39th Infantry Battalion nagpahigayon og manhunt operation batok sa mga suspek.
Karong adlawa usab ipailawom sa psychological debriefing ang mga biktima ingon usab ang pagpasaka og kaso.