Nasapwan nga yara na sa advance state of decomposition ang bangkay sang kapitan nga gin-report missing sang iya himata sang tinalikdan nga Setyembre 13.
Sandig sa impormasyon nagikan sa Tapaz Municipal Police Station, Setyembre 18 takna alas 5:00 sang hapon, nakabaton sila sang report gikan kay Rona Castor, barangay secretary sang Brgy. Tacayan nga may yara sang bangkay nga nasapwan ang mga tanod nga nagalutaw sa Panay River.
Gilayon naman nga nagpatigayon sang imbestigasyon ang mga kapulisan sa lugar kag nagpadulong man ang pamilya sang biktima.
Positibo nga ginkilala ni Rosiela Dimas ang bangkay nga amo ang iya magulang nga si Winnie Dimas, 29-anyos, Barangay Kapitan sang Brgy. Aglupacan sa nasambit nga banwa.
Sa interview sang Brigada News FM Roxas City kay Police Major jhon Almarino Bonior, hepe sang Tapaz PNP, ginpahayag sini nga magluwas sa pagkalumos nakit-an sa lawas sang biktima ang mga gaob kag may pilas ini sa ulo.
Sa karon, yara sa isa ka punerarya ang bangkay sang biktima kag ginpaidalom sa post mortem examination agud mahibaluan kun may yara sang foul play ang kamatayon sini. | Judy Ann Juare