BARANGAY KAPITAN SA ASTURIAS, ASAWA, GIPUSIL-PATAY

Makita sa CCTV footage nga gi-upload sa Brigada News FM Cebu page kung giunsa pagpusil-patay sa riding-in-tandem ang barangay kapitan sa Manguiao sa lungsod sa Asturias, Sugbo kagahanihang alas 9:00 sa buntag, Martes, Marso 14, 2023.

Sa video, gisikitan sa mga suspek ang motorsiklo nga gimaneho ni Barangay Kapitan Mario Tundag ug gipusil kini sa makadaghang higayon.

Wala usab gipalabay sa mga mamumuno ang angkas sa kapitan nga asawa niini nga si Edna Tundag.

Sa inisyal nga imbestigasyon sa kapulisan sa Asturias, nasayran nga luwan ang magtiayon sa kolor puti nga Honda PCX nga motorsiklo nga gimaneho sa kapitan gikan sa lungsod sa Balamban dihang gisundan sa wa mailhing mamumuno ug gipusil ang mga biktima gamit ang kalibre 45 nga pistola sa atubangan sa Asturias Elementary School .

Human sa pagpamusil, nitalikod ang mga mamumuno ug mipaengon sa direksyon sa Balamban.

Subay niini, gimanduan sa Cebu Police Provincial Office (CPPO) ang tanang police units sa silingang mga lungsod sa paghimo og dragnet operation.

Si Lieutenant Colonel Mark Gifter Sucalit, deputy provincial director for operations sa CPPO, niingon nga ilang imbestigahon ang tanang anggulo sa krimen, lakip na ang personal grudge, politika ug business interest.

Matud ni Sucalit nga ang biktima napriso na kaniadto tungod sa illegal possession of firearm.///MICHELLE CRASTE

PHOTO:DHON DHON

Leave a Reply

Your email address will not be published. Required fields are marked *