Bawal Bastos ordinance sa bayan ng Basud aprubado na sa ikatlo at huling pagbasa

CAMARINES NORTE- Aprubado na sa ikatlo at huling pagbasa ng Sangguniang Bayan ang “Safe Spaces” o mas kilala bilang Bawal Bastos Ordinance sa bayan ng Basud sa isinagawang regular na sesyon nitong Lunes, May 15.

Ang ordinansa ay iniakda ni Konsehal Norma Zamudio  na tinawag na Bawal Bastos Ordinance of the Municipality of Basud na layong labanan ang gender-based sexual harassment sa kalsada, public places, online, workplaces at educational at training institutions.

Bago maaprobahan ang naturang ordinansa ay nagkaroon ang pag-aalinlangan ang isang miyembro ng SB dahil sa sobrang taas ng penalidad.

Ayon kay Konsehal Pablo Ablaneda alinsunod sa Local Government Code limitado lang ang kapangyarihan ng LGU sa pagpapataw ng penalidad.

Sa ilalim kasi ng Republic Act No 11313 o ang Safe Spaces Act na sinusugan ng ordinansa ay aabot ng daang libo ang penalidad

Tanging ang korte lamang din umano ang magpapasya kung guilty o hindi ang isang inaakusahan sa krimen.

Sa huli ay napagkasunduan din ng mga miyembro ng SB na aprubahan ang ordinansa sa ikalawang pagbasa at nagkaroon lang ng kaunting amendments hanggang sa tuluyan itong maaprobahan ikatlo at huling pagbasa.

Sa ilalim ng ordinansa ipagbabawal na ang “catcalling” o pagsipol, panghihipo, mga homophobic, transphobic o misogynistic remarks o mga negatibo at sekswal na patutsada sa mga mga babae  maging sa mga miyembro LGBTQ plus community.

Ipinagbabawal din ang pagtitig na may pagnanasa, pagpilit o paulit-ulit na pagkuha ng personal na detalye,  pagpapakita ng pribadong bahagi ng katawan o paggawa ng sexual advances pisikal man o verbal sa mga kababaihan.

Multang P1, 500 hanggang P2, 500 ang ipapataw sa mga lalabag.