Mas ginapasangkad pa sang Bureau of Fisheries and Aquatic Resources (BFAR) -Capiz ang ila nga pagpaalinton sa mga pumuluyo matapos nagpositibo sa red tide ang kalalawran sang Capiz.
Ini ang nangin pahayag ni BFAR Capiz, Provincial Director Edwin Candelario Javier sang mapakig-angutan sang Brigada News FM- Roxas City.
Suno kay Javier, hugot ang ila kampanya sa pagdumili nga magkuha kag magbaligya sang mga tahong kag iban pa nga pakinhason sa mga coastal areas sang Sapian Bay (Ivisan kag Sapian), President Roxas, Roxas City, Panay, kag Pilar.
Dugang pa sini, kada semana nagakuha na sila sang meat and water samples bilang kabahin sang protocol kun may magluntad nga redtide sa nasambit nga lugar.
Nagpaandam naman ang BFAR Capiz,nga maglikaw sa pagkaon kag pagharvest sang mga tahong kag talaba samtang may presensya pa sang paralytic selfish poison (PSP).
Matandaan, ginbawian sang kabuhi ang 9-ka tuig nga lalaki samtang ginpadangat naman sa ospital ang 31 ka mga indibidwal matapos nagkaon sang pakinhason nga ginaalegar positibo sa redtide. | KMD Gicalde