Bicol police, kinondena ang NPA matapos masawi sa IED ang FEU football player

Naniniwala ang Bicol police na ang New People’s Army ang nagtanim na improvised explosive device na kumitil sa buhay ng dating football player ng Far Eastern University na si Keith Absalon, 21-anyos at sa pinsan nito na si Nolven Absalon, 40-anyos.

Base sa ulat ay nagbibisikleta ang dalawang biktima kasama ang kanilang mga kaanak nang sumabog ang IED bandang alas-6:35 ng umaga sa Purok 4, Barangay Anas kahapon.

Itinakbo naman ang lalaking anak ni Nolven na si Chrisbin Daniel, 16-anyos, sa Masbate Provincial Hospital para maipagamot ang mga tinamo nitong pinsala.

Sinabi ng Bicol police na kinokondena nila ang walang awa na pagpapasabog ng NPA na pumapatay sa mga walang kalaban-laban na sibilyan.

Binigyang diin ng mga otoridad na malinaw na pruweba ito na makasarili ang pilosopiya ng NPA, at walang kinikilalang tao, lugar, o edad ang karahasan.

Samantala, nagluksa naman ang FEU community sa pagkamatay ni Absalon.

Inihayag ng FEU na labis nitong ikinalungkot ang pagpanaw ni Kieth na nagsimula sa football journey nito kasama ang FEU noong ito ay 13-anyos pa lamang sa ika-pitong baitang noong 2013.

Ipinunto rin ng unibersidad na kinilala si Absalon bilang isa sa pinakamahusay na high school players sa buong kasaysayan ng UAAP football.

Leave a Reply

Your email address will not be published. Required fields are marked *