Bicolanong kongresista, umapela sa National IATF na ibaba sa Alert Level 1 ang COVID-19 status sa Albay

BNFM BICOL—Umapela si Albay 2^nd District Representative Cong. Joey Salceda sa National Inter Agency Task Force na ibaba na sa Alert Level 1 ang COVID-19 status sa lalawigan ng Albay.

Sa pamamagitan ng liham, ipinakiusap ni Salceda kay Health Secretary at IATF Chairperson- Francisco Duque III, na ikonsidera ang pagbaba ng Alert Status sa probinsya lalo na at batay sa pinakahuling datus as of March 27, zero COVID-19 ICU admissions at zero COVID-19 hospitalization rate na rin ang lalawigan.

Pagbibigay diin nito, malaki aniya ang epekto ng alert classifications sa economic activity ng isang lugar, kung saan inihalimbawa ng mambabatas ang public transportation sector.

Kung maibababa umano sa Alert Level 1 ang Albay, pahihintulutan na ang 100% seating capacity sa public transport na malaking bagay lalo na at ang mga pampublikong sasakyan ang pangunahing mode of transportation ng mga residente.

Sa huli, inihayag ng kongresista na kumpiyansa siyang kaya nang tugunan ng health care system sa probinsya ang COVID-19 infections sa pamamagitan pa rin ng pagpapatupad ng health protocols at pagiging “widely available” ng bakuna kontra COVID-19.###