IBAJAY, AKLAN—Mas o menos Php 270,000 pesos nga balor it ginapatihan nga shabu do narecover sa position ag control it sangka 61 anyos nga eaeaki matapos nga madakpan raya sa ginpatigayon nga drug buy bust operation sa Brgy. Laguinbanua, Ibajay, Aklan.
Ginkilaea do nadakpan nga ginakabig man nga “bigtime drug pusher” kay Melquiadez Gomez, tubong Surigao del Sur apang presente nga nagaistar sa nasambit nga lugar.
Sa pakipag-angot it Brigada News FM Kalibo kay Police Lieutenant Colonel Frenzy Andrade it Aklan Provincial Drug Enforcement Unit (PDEU), masobra sang buean nga gintiktikan nanda do suspek ag do supply it ginabaligya kara nga droga hay halin sa guwa it Region 6.
Sa nasambit nga operasyon, owa man sigon nagdaeagan do suspek kung siin nauna eon raya nga habak-ean it sangka plastic sachet nga nagabug-at it haeos limang gramo kabaylo it Php 25,000 nga buy bust money samtang sa ginpatigayon nga body search kana hay nabue-an raya it kadugangan nga pitong bulto nga suspected shabu.
Nasayuran nga may dating kaso si Gomez sa Recto may kahilabtanan sa illegal nga droga.
Do suspek hay ginpaidaeom sa drug test ag nakataeana nga pasakaan it kasong pag-eapas sa RA 9165 o Comprehensive Dangerous Drugs Act of 2002. // SHERRY ANNE REUNIR-VIDAL