Bilang ng mga tinamaan ng COVID-19 sa Catanduanes sumampa na sa mahigit 900; 78% ng target population, nabakunahan na

CATANDUANES—Pumalo na sa 902 ang kumpirmadong kaso ng COVID-19 sa probinsya ng Catanduanes matapos na madagdagan ng walong panibagong kaso ng sakit kahapon.

Batay sa inilabas na report ng DOH-Bicol, apat sa mga bagong naitalang kaso ang mula sa bayan ng Bagamanoc at apat na kaso rin ang nairehistro sa bayan ng Pandan.

Bunsod nito pumalo na sa 120 ang nananatiling aktibong kaso ng sakit sa lalawigan habang wala namang naidagdag sa bilang ng mga gumaling kaya’t nanatili ito sa 771.

Samantala, nasa 11 naman ang COVID-19 fatalities sa probinsya habang nasa 35.85% ang kanilang positivity rate.

Kaugnay nito, nasa 78% na ng target population sa Catanduanes ang nabakunahan na kontra COVID-19, batay sa pinakahuling datus na inilabas ng Provincial Health Office nitong August 3.

Nangangahulugan, na nasa 26,157 individuals na sa lalawigan na pasok sa prioritization groups ang nakatanggap na ng kanilang first dose habang nasa 20,512 naman ang fully vaccinated na.

Patuloy ang panawagan ng PHO sa mga Catandunganon na matamang sundin ang mga ipinatutupad na safety health protocols kontra COVID-19 at makiisa sa nagpapatuloy na vaccination roll out sa probinsya upang maiwasan ang pagdami ng mga tinatamaan ng COVID-19 sa isang lalawigan.###