Hugot ang pagbantay sang mga otoridad sa bilog nga coastal barangays sa banwa sang Pilar matapos nagpapanaog sang Executive Order si Mayor Arnold Perez nga dumilian ang pagkuha, pagbaligya kag pagkaon sang mga panginhason kasunod sang report nga may yara sang napatay kag ginpangdala sa ospital matapos nakakaon sang tahong ukon green shells.
Sa interview sang Brigada News FM Roxas City kay Mayor Perez, iya ginpahayag nga nakakuha na sang water kag shellfish meat samples ang mga katapo sang office of the provincial agricturist, municipal agriculture, kag BFAR sa mga baybayon nga sakop sang Pilar agud ipaidalom sa laboratory test kun ini ang positibo sa shellfish poison ukon red tide.
Suno diri, duha tubtob tatlo ka adlaw maga-abot na ang resulta kag nagalaom ini nga kuntani negatibo lang sa red tide ang kalalawran nga sakop sang Pilar.
Ginkasubo man sang alkalde nga may yara gid sang napatay sa iya nasakupan kag madamo ang na-ospital bangud sa pagkaon sang panginhason nga nagikan sa ila banwa.
Ginsiguro man sini nga magahatag siya sang bulig sa mga naapektuhan sang Paralytic Shellfish Poisoning (PSP).
Nahibaluan nga nagsaka na sa 35 ka mga indibidwal ang nahilo, base ini sa pinakaulihi nga datos gikan sa Municipal Agriculture’s Office sang nasambit nga banwa.
Ang mga biktima ang nagikan sa Barangay Binaobawan, Natividad, kag San Ramon kun sa diin lunsay nakabatyag sang pagpalanakit sang tiyan, pagpalanuka, paglingin sang ulo kag nabudlayan nga magginhawa.
Sa karon, ginapanugyanan ang publiko nga kun may mabatyagan nga sintomas sang PSP gilayon nga magpakonsulta sa doktor. | Judy Ann Juare