Brgy. Kapitan ng Poblacion, Rapu-Rapu, Albay, labis ang pasasalamat sa isinagawang outreach program ng NAVFORSOL

LEGAZPI CITY – Nagpahayag ng labis na pasasalamat ang barangay kapitan ng Poblacion, Rapu-rapu, Albay dahil sa isinagawang outreach program ng Naval Forces of Southern Luzon (NAVFORSOL).

Sa panayam ng Brigada News FM Legazpi kay Rolando Alvarez, sinabi niyang malaking tulong ang aktibidad sa kanilang barangay dahil karamihan ng mga hanap-buhay sa lugar ay pangingisda at pagsasaka.

Masaya umano siyang nagkaroon ng mga aktibidad doon katulad ng medical mission sa buwang ito, dahil may mga buwan umanong mahirap ang transportasyon sa kanilang lugar at mahirap din para sa ilang residente na pumunta pa sa lunsod upang makapagpagamot.

Aniya, lahat ng mga gamot ay naibibigay sa mga tao dahil ang kanilang budget sa barangay ay isang beses lamang para sa isang taon at ang prayoridad umano nilang gamot ay para sa mga bata at maintenance para sa mga matatanda.

Matatandaan, noong Sabado, isinagawa ng NAVFORSOL ang nasabing aktibidad katuwang ang Philippine Army, Philippine Army Finance Center Producers Integrated Cooperative, BRTTH, LGU at iba pang stakeholders.