Naglab-ot sa 125 ka mga maisog nga bata nga lalaki ang nangin benepisyaryo sa ginlunsar nga Brigada Operation Tuli sa Brgy. Culasi, Roxas City subong nga adlaw sang Sabado, Hulyo 29, 2023.
Ang nasambit nga programa ang may tema nga “Kaisog kag pagkalalaki, ipadayon”, katuyuan sang programa nga mahatagan sang kahigayunan ang mga kabataan nga maserkom sang libre samtang wala pa sang klase kag agud mangin malimpyuhon sa ila kalawasan.
Nahibaluan nga naglab-ot sa 200 ka mga kabataan ang nagpalista apang 125 lamang diri ang nagmadinalag-on nga maserkom bangud ang iban sa ila ang alangon pa.
Ginpahayag ni Dr. Venus Loretizo, Capiz Hospital Management Unit head, nga dapat naga-edad sang 12 pataas kag may bug-at nga 30 kilos pataas ang pwedi nga mapaidalom sa operation tuli.
Ang Brigada Operation Tuli ang tuigan nga aktibidad sang Brigada News FM kaupod ang gintingub nga pwersa sang One Tahanan, Brigada Foundation Inc., agud makahatag sang serbisyo sa mga pumuluyo nga may yara sang Brigada News FM Station.
Kabulig sang Brigada News FM Roxas City, Capiz ang Medical team ni Governor Fredenil Castro nga “Gugma Medical Team” nga ginakabug-usan sang mga doktor kag nurses gikan sa Bailan, Tapaz, Dao kag Mambusao District Hospital upod man ang mga Barangay Officials kag BHW sang Brgy. Culasi. | Judy Ann Juare