Narekober han mga kasundaluhan han 3IB Infantry Batallion an patay nga lawas ni Kagawad Jaime Asinas ha Brgy. San Jose, Las Navas, Northern Samar.
Hi Kagawad Asinas in nawara mahuman kidnapon ngan patayon han mga miyembro han Communist NPA Terrorists (CNTs) ha bisinad han Barangay Epaw, Las Navas, Northern Samar dida han Hulyo 9, 2022.
Nadiskubrehan an lawas ni Kagawad Asinas matungod impormasyon nga ginhatag ni Alfredo Cocoya alyas Lawin, anay miyembro han Sub-Regional Security Force (SRSF).
Positibo naman ini nga kinilala han pamilya matungod ha panapton ngan boots nga sul-ot ni Asinas san o ini patayon.
Subay ha pamilya, hi kagawad Asinas in ginkidnap matungod nagbaribad ini nga gamiton an Internal Revenue Allotment (IRA) han barangay kumo financial support ha CNTs kun diin ginsuspetsaran ini nga informant han 20th Infantry Battalion.
Subay naman ha witness nga ginkilala nga hi alias Bayot, san o an brutal nga pagpatay in ginpwersa pa ini nga mag-ukab ha iya lubnganan gamit an kahoy.
Mahuman makaukab in ginhigtan pa ini han NPA ngan ginpakianhan kun hi o an iya handler pero, waray mag-aringasa hi Asinas ngan didto na ini ginpusil ha ulo gamit an M16 riffle. Ginpanmumuno gihapon ini hin pira kabeses san o iglubong an iya lawas han NPA.
Duro naman an kasina ngan kasubo ni Jelly Asinas, asawa han namatay nga kagawad bahin ha deri makatawo nga ginbuhat han mga terorista nga NPA.