Call center agent, ginholdap sa atubang sang brgy. hall

Ginholdap sang wala matumod nga mga kawatan ang 22-anyos nga call center agent sa atubang sang Brgy. Hall sang Barangay X, Roxas City, Capiz.

Ang wala ginhingadlan nga biktima residente sang Barangay Hanglid, banwa sang President Roxas apang temporaryo nga nagapuyo sa siyudad.

Sandig sa ginpabalhag sa Roxas City Police Station sang biktima, ginapahayag nga samtang nagalakat ini kaupod ang iya abyan takna alas-2:00 sa kaagahon hinali lang nga nagpundo ang motorsiklo sakay ang duha ka mga lalaki kag nagdeklarar sang ‘hold-up’.

Dugang pa, gintinguhan pa sang biktima nga magbato apang nag gabot sang hinangiban ang isa sa mga suspek kag gintutok sa iya.

Nataban sang mga holdapers ang bag nga naga-unod sang wallet, tumbler, mga identification cards (IDs), kag cellphone nga nagabalor sang P9,000.

Matapos ang insidente madasig nagpalagyo ang mga suspek sa direksyon padulong sa Barangay Lawaan.

Sa karon, padayon pa ang imbistigasyon sang kapulisan angut sa natabo nga pagpangawat.//KMD Gicalde

Leave a Reply

Your email address will not be published. Required fields are marked *