LEGAZPI CITY – Padagos an pigtataong asistensiya kan Comission on Human Rights (CHR) Bicol sa mga kababaihang nagpadara kan saindang mga reklamo sa man lain-lain na klase ki pang-aabuso.
Sa intrevista kan Brigada News FM Legazpi kay CHR Bicol Regional Director, Arlene Alangco, igwa na sindang apat na nairehistrong reklamo sa gender-based violence asin 25 katao na an naghahagad o nagri-request nin asistensiya sa saindang opisina sa paglaog kan first quarter ngunyan na taon.
Segun kay Alangco, sa request assistance ninda pig-oorolayan asin maaraman kun ipapadagos kan mga nagreklamo an pagfile ki kaso o iagi sa medyos an mga ini.
Pigsabi niya na may mga kasong kaipuhan nanggad na ipadagos arog kan rape, murder asin iba pang magagabat na kaso na dai pwedesir iagi sa areglo.
Dugang pa kaini, may mga pigbugtak sinda na mga poster sa mga baranggay na hale sa gobyerno-lokal na an laog iyo an mga impormasyon asin paagi kun pano makahagad nin tabang an mga tawo asin kababaihang nangangaipo kaini.
Apwera digdi, an naunambitan na ahensiya, nagsasagibo man ki mga trainings asin aktibidad kun sain pigdidiskutir ninda an mga ley siring kan Republic Act No. 9262 ta nganing maaraman ninda kun anong kaso an pwedesir nindang isangat sa mga tawong mapang-abuso.
Kun magigirumduman, kadakol na an napabaretang sunod-sunod na kaso nin pang-aabuso sa mga kababaihan sa paglaog kan bulan kan Marso, kun sain pigseselebrar kuta an Women’s Month komo pag-apresyar dapat sa sainda.
Mientrastanto, sabi ni Alangco, dai matakot an mga tawo asin dai pag-isipon kun sain maanap ki pambayad in kaso magpadagos kan saindang reklamo, huli ta may itataong sadiring abugado an ahensiya, siring man an gobyerno kun sain iyo an mapresinta sainda sa korte. | MAEDIN DEXISNE