City College of Ormoc, posible nga ablihan sa Agosto 2023

Usa sa gipangandam niining panahona sa lokal nga pangagamhanan sa Ormoc mao ang pag-arangkada na sa City College of Ormoc.

Sa ekslusibo nga pakighinabi sa Brigada News FM Ormoc kang Education Committee Chairman Hon. Atty. Nolito Quilang kagahapon, Pebrero 23, 2023, dungan sa pagpahigayon sa Barangay FOI didto sa City Hall, kini nagkanayon nga posible magsugod ang labing unang klase sa labing unang semestre sa buwan sa Agosto karong tuiga.

Pagtug-an sa konsehal, ang tanan nakadepende daw sa Commission on Higher Education kon CHED nga gipaabot nga mobisita kini sa dakbayan sa sunod buwan.

Samtang nagpaabot, padayon daw ang pagpangandam sa dakbayan sama nalang sa physical structure, building, ug classroom, labot na unya ang pag-hire sa 25 ngadto sa 30 ka mga empleyado diin 16 niini ang alang sa academics.

Tungod kay wa pay kaugalingon nga building kay nagpaabot pa pud daw sa surplus sa budget karong tuiga, giplanohan nga temporaryong ipahimutang ang nahisgutang City College sa bag-ong building sud sa Ormoc City Technological Manpower Training and Research Center.

Dugang niini, sa pagakakaron upat ka kurso ang gihanyag ug mao kining mga mosunod: BS Social Work (matud pa, duha ka unibersidad lang ang aduna niini sa tibuok rehiyon 8); BS Office Administration; BS Business Administration major in Marketing (sugyot kini sa business sectors); ug, BS Public Administration. Apan pagtataw sa konsehal nga dunay gipahigayon nga survey kabahin niini.

Dugang pa ni Hon. Quilang, di daw tuyo sa City College nga makigkompetinsya sa ubang kolehiyo ug unibersidad hinungdan nga wa na sila mihanyag og mga kurso nga naa na sa siyudad.

Tungod niini, sa buwan Marso, ipahigayon usab ang career guidance sa tanang estudyante sa Grade 12.

Base sa City Ordinance No. 91, s. 2022, ang pagtungha sa City College of Ormoc, libre nga mapahimuslan sa mga Ormocanon.

Panghinaot karon ni Hon. Quilang nga ang nahisgutang kolehiyo ang makatabang pa sa paglambo sa dakbayan pinaagi sa pag-produce og daghan pang mga propesyonal.

Leave a Reply

Your email address will not be published. Required fields are marked *