Mainit kag malipayon nga gin-abi abi sang mga tumuluo sa syudad kag probinsya ang pagbalik ni Most Rev. Victor B. Bendico., D.D ang ika-4 nga Arsobispo sang Capiz.
Sa ginpatigayon nga civic and ecclesiastical reception sa Roxas City plaza, ginpasalamatan ni Msgr. Bendico ang mga opisyales sang gobyerno kag tumuluo nga malipayon gid sa iya pag-abot.
Ginbaton man sini ang symbolic key nga gintan-ay ni Governor Fredenil ‘Oto’ Castro nga nagapahayag sa pagbaton sa iya bilang bag-o nga tagpamuno sang Simbahang Katolika sa probinsya.
Mahibaluan nga tumandok si Msgr. Bendico sang Capiz kag gin-ordinahan sang Abril 14, 1984 ni late Archbishop Antonio Frondosa.
Ginhingadlan ni Pope Francis bilang ika-4 nga Arsobispo sang Capiz si Msgr. Bendico sang Marso 3, 2023 matapos nga nabakante ang pwesto sang pagka-obispo bangud sa pagpahamtang kay Most Rev. Jose Cardinal Advincula Jr. bilang Arsobispo sang Archdiocese of Manila sang Hunyo 24, 2021.
Si Archbishop Victor Bendico nagpangalagad anay nga Rector sang Immaculate Concepcion Metropolitan Cathedral antes ini ginsaylo sa Archdiocese sang Baguio sa diin siya nagpangalagad sa sulod sang 6 ka tuig kag nagbilin sang madamo nga legasiya.
Sa iya pagbalik, pagadumalahan niya ang kapin 130 ka kaparian sa bilog nga probinsya sang Capiz kag ang ginatos ka libo nga mga Katoliko. Pagapangunahan ni Apostolic Nuncio to the Philippines His Excellency Most. Rev. Charles John Brown, D. D. ang solemn installation ni Msgr. Bendico buwas nga adlaw, Mayo 3, 2023, las-9:00 sang aga sa Immaculate Conception Metropolitan Cathedral nga pagatambungan naman sang mga Obispo nagikan sa nagkalain-lain nga diocese sa Pilipinas, mga kaparian sang archdiocese sang Capiz kag mga tumuluo. | Judy Ann Juare