Sambilog naninahan nga sakay it natumbang closed van sa Brgy. Bulwang, Numancia, Aklan ala 1:18 kainat aga-aga.
Sa initial nga imbistigasyon it Numancia MPS, nakilaea ru driver nga si Ranel Dela Cruz, sa legal nga edad at presenting naga estar sa Brgy. Dongon West, Numancia, Aklan.
Samtang, ru mga sakay hay sanday John Kimuel Geraldo, 20 anyos, ag Jiffy Gerardo, 25 anyos, magkaeampod ag residente it Brgy. Dongon –East, Numancia.
Naka angkon it lastro sa ueo ag ibang parte it kaeawasan si John Kimuel Geraldo ru sakay nga naka pwesto sa kilid it bintana.
Yupi ru likod nga portion it closed van matapos matumba sa kurbadang karsadahon dahil sa uwa ma control ru manobela sa kadasigon itpag maneho.
Nasagi pa ru signange it DPWH sa kilid it karsada.
Nahimo pang daehon it tricycle driver ru 1 sa mga biktima paadto sa Aklan Provincial Hospital ag padayon pang gina bueong.
Samtang, out patient man ru anang igkampod nga sakay man it closed van.
Nagresponde man ru mga katapo it Numancia MPS, Bureau of Fire Protection (BFP)-Numancia ag Numancia MDRRMO.
Sa makaron, padayon pa nga gina usoy it Numancia MPS ru driver it closed van matapos makapaeagyo sa lugar.
Nasayuran nga halin sa resto bar sa Kalibo ru mga biktima ag naga pauli eon konta sa andang mga panimaeay.//MARIVIC Y. ILIN