Masugdan na og decongest ang nagtipun-og nga kaso sa hukmanan dungan sa gipatuman nga mas epektibong pagdumala sa hustisya sa Pilipinas pinaagi sa bag-ong basihan sa pagpasaka og sumbong.
Gibutyag ni Department of Justice-Senior Assistant Regional Prosecutor Joseph Edwardsam Eullaran nga inay probable cause, gamiton na karon nga basihan sa pagpasaka og sumbong ang Prima Facie Case ug Reasonable Certainty of Conviction o makatarunganon nga kasigurohan nga mapamatud-an nga sad-an.
Ubos sa Dept. Circular No. 020 nga gipagawas niadtong March 31, 2023, gimandoan ang prosecutors nga aktibong molambigit sa pag-imbestiga sa mga krimen pinaagi sa pagtabang sa mga private complaints ug mga law enforcers diha pa lamang sa case build-up aron masiguro nga kadto lamang mga kaso nga adunay reasonable certainty of conviction ang mapasaka sa mga hukmanan.
Giklaro sab ni Prosecutor Eullaran nga ang mga dagko nga kaso o heinous crime lamang ang masakop niini nga kabag-uhan.
Sa pagpahigayon sa case-build up, dunay 10 ka adlaw ang mga prosecutors pagsuta sa mga sumbong kung kumpleto na ba ang gikinahanglan nga mga ebidensya, kung dunay kulang, ang sumbong ibalik sa private complainant o sa ahensya nga maoy nagpasaka sa sumbong lakip ang report sa evaluation inubanan sa advice kabahin sa kakulangon sa ebidensya ug paggiya kung unsa pa nga mga ebidensya nga angayan kuhaon ug e-sumiter.
Sa mga kaso nga igo na ang ebidensya, mohatag ug certification ang prosecutor nga aduna nay igon rason aron magpahigayon sa preliminary investigation ang opisina sa piskalya.