Gawas sa nagpadayon karon nga Risk-Based Targeted Expanded Testing sa tibuok probinsya sa Sarangani kung diin nagapahigayon og massive testing sa mga lugar nga taas ang ihap sa mga natakbuyan sa COVID-19, gipadaghan usab sa pamunuan ni Governor Steve Chiongbian Solon kauban ang mga mayor ang mga contact tracer.
Kung lig-on ang testing ug tracing system, hinanali lang mahibal-an, madakpan, ma-isolate ug matambalan ang mga naduolan ug mga direct contact sa nag-positibo sa Coronavirus. Gitigum alang sa orientation, training ug skills enhancement, nila Provincial Health Officer Dr. Arvin Alejandro sulod sa Sarangani Capitol Gymnasium ang dungag pwersa nga galangkob sa contact tracing team sa Sarangani Province.
Gawas sa otsyentay syete (87) kabuok contact tracers nga gi-swelduhan sa DILG na-assign sa Kapitolyo ug sa pito ka munisipyo, ug ang laing gi-hire sa mga munisipyo, nidungag sa pwersa sa Sarangani contact tracing team ang traynta (30) gikan sa kapulisan sa Sarangani.
Lakip na ang baynte singko (25) ka mga nurse gikan sa DepEd Sarangani. Gibansay usab sila sa pagbakuna batok COVID-19. Apil gibansay, sa direktiba ni Governor Solon, ang mga nurse sa mga dagko nga pribadong kumpanya nga nag-negosyo sa Sarangani Province, sama sa Sarangani Energy Corporation ug Alsons, ug ang mga personahe sa Bureau of Fire Protection.