Padayon kag wala naga-untat ang mga katapo sang City Ordinances and Regulations Enforcement (CORE) Unit sa pagpangdakop sa mga nagalapas sa mga ginapatuman nga ordinansa sa syudad sang Roxas.
Ini ang ginpahayag ni Mr. Ronald Amigo, CENRO/CORE head sang ma-interview sang Brigada News FM Roxas City.
Gin-athag ni Amigo, sang nakaligad nga semana nagbulig ang mga CORE Mashals sa mga kapulisan sa syudad sa pag-implementar sang peace and order sa ginhiwat nga Barangay and Sangguniang Kabataan Election kag Undas 2023.
Ginpahayag man sini, kahapon nga adlaw sang Lunes, nakadakop ang mga katapo sang CORE sang 7 ka violators sa No Helmet, No Driver Ordinance; 4 violators sa Smoke/Vape Free Ordinance; 1 violator sa Comprehensive Anti-Littering and Anti-Dumping Ordinance kag 1 violator sa Open Mufler.
Nagalibot man sa pila ka mga establistment sa syudad ang mga natungdan ilabi na sa Baybay agud i-monitor ang mga nagalapas sa Baybayon ko, Limpyohan ko Ordinace.
Suno kay Amigo, nagnubo na sa karon ang mga nagalapas sa ordinansa ikumpara sadtong una nga bulan sang implementasyon.
Nagpanugyan man ini sa publiko nga likawan nga maglapas sa ordinansa agud indi magbayad sang multa kag mangin responsable sa palibot. | Judy Ann Juare