ANG panaghiusa ug pagsakripisyo sa mga restrictions nga gipatuman ang makatabang nga malikayan ang COVID-19.
Sa karon, padayun nga anaa sa General Community Quarantine kun GCQ status ang GenSan ug dungan niini ang pagpatuman usab sa curfew hour, liquor ban ug no Sunday movement.
Matud ni Dr. Fidel Peñamante, presidente sa Philippine Medical Society GenSan chapter ang tanan nga gipatuman ang makatabang aron nga mapugngan ang pagtakod sa virus.
Gipasabot niini nga kung walay tawo nga matakdan ang virus, mapugngan usab ang pagdaghan sa kaso mao nga padayung ginaawhag ang tanan mutuman sa mga health protocols, ingon man social distancing.
Dugang ni Peñamante, bisan kun wala unay mga panagtapok, pagtagay, ug limitado nga paggawas, kini ang makatabang og dako aron makunhuran ang pagtakod sa virus labi pa karon nga may Delta variant nga mas doble ang pagtakod. Giklaro sa doktor nga dili matud pa lalim nga matakdan sa virus, tungod sa kadako sa gastos niini mao nga mas maayo ang magsakripisyo una sa karon, mo-adopt sa mga kausaban sama sa liquor ban, no Sunday movement aron nga dili usab malisdan ang health system.