LEGAZPI CITY – Nagsagawa ang Department of Agriculture – Agricultural Training Institute (DA-ATI) Regional Training Center 5 ng National Livestock Program (NLP) Regional Stakeholders’ Consultative Forum para sa mga plano sa susunod na taon at pagtugmain ang mga ito upang maiangat ang sektor ng mga baka at manok sa Bicol.
Pinangunahan ito ni DA-ATI Livestock Point Person, Emmanuel Orogo, kasama ang lahat ng livestock program coordinators at iba’t ibang stakeholder sa rehiyon.
Dumalo rin sa nasabing aktibidad ang Livestock Division Representative mula sa DA-RFO 5, provincial, municipal at city veterinarians, training officers, coordinators, maging ang mga pangulo at kinatawan mula sa iba’t ibang Farmer associations, at iba pang ahensya ng gobyerno.
Nilalayon ng aktibidad na suriin ang bisa ng mga programa, proyekto na may kinalaman sa mga baka at manok at tugunan ang mga alalahanin sa mga hayop sa rehiyon upang makapaghatid ng napapanahon, naaangkop, at progresibong programang tumutugon sa kanilang mga pangangailangan.
Samantala, nagsumite rin ang Provincial Livestock Point Persons ng kanilang mga plano para sa Fiscal Year 2024-2025.