Daang dumot, motibo sa pagdunggab-patay sa usa ka laborer

Daang dumot ang gilantaw nga motibo sa Digos Police Station sa pagdunggab-patay sa suspek ngadto sa biktima sa Purok Rambutan 5, Brgy Goma, Digos City niadtong milbay’ng Martes, Nobyembre 14, 2023.

Ang biktima nailang si Ariel Bitil Ondong, legal ang pangidaron, laborer ug residente sa nasangpit nga lugar.

Sumala pa sa mga nakasaksi, nag-inum pa ang biktima sa panimalay sa usa ka alyas Mar, ug kalit nalamang nga miabot ang suspek nga nailang si Junior, 49, laborer ug nanimuyo sa maong lugar,  ug bitbit na nini ang kutsilyo nga gibana-banaan nga dunay gitas-on nga 11 ka pulgada.

Walay daghang pangutana, gidunggab sa suspek ang biktima tumong sa nagkadaiyang bahin sa lawas nga maoy hinungdan sa iyang hinanaling kamatayon.

Gisulayan pa sa pagdala sa Davao del Sur Provincial Hospital ang biktima apan gideklarang patay ni attending physician Anthony L Araneta II.

Nadakpan hinoon sa kapulisan ang suspek nga karon gihikay na ang kasong ipasaka batok sa nahisgutan.