GAWAS sa mga establisyemento, pribado ug pampublikong mga buhatan, gilaraw na usab karon sa City Health Office ang pagpatuman og scanning sa Davao QR sa tanang public utility vehicle.
Sumala kang Dr. Ashley Lopez, Acting Head sa CHO, kini aron mapalig-on pa ang contact tracing sa syudad aron mas paspas ang pagtumbok sa mga nagpositibo ug nakahimamat sa COVID-19 patients.
Posibleng ipatuman kini sa mga jeep, bus ug taxi apan sa karon ginatutukan una sa CHO ang surveillance testing sa PUV driver ug delivery drivers nga gilaumang matapos sa Mayo 8 apan dako ang posibildad nga malugwayan pa hangtud bulan sa Hunyo tungod sa kadaghang drayber sa syudad.
Sa laing bahin, gidayeg usab ni Davao City Mayor Sara Duterte-Carpio kaganiha sa inteview sa disaster radio ang nahimong proseso ug turn-out sa nagpadayong swab testing sa mga pampublikong drayber lakip sa mga delivery driver.
