DavNor Balay Silangan gidayeg pag-ayo sa PDEA XI

Excellent!  ang pagdayeg sa Philippine Drug Enforcement Agency (PDEA) XI  sa gihimong Balay Silangan sa Davao del Norte, ang dapit-silongan sa mga drug offenders aron mareporma ug mahimong produktibong miembro sa komunidad.

Kini ang reakayon ni PDEA XI ARD Mario Ramos, atol sa pag-abli sa bag-ong pasilidad nga anaa ra gipahimutang sulod sa DavNor Capitol compound.

Midugang ang PDEA ARD XI nga kini ang iyang pag-assess sa inisyatibo sa administrasyon ni Gobernador Edwin “Kuya Gob” Jubahib tungod kay gihimo ang imprastruktura para gyod sa maong katuyoan.

Ang Balay Silangan gitukod sa probinsyal nga panggamhanan sa maong probinsya alang sa mga drug offenders (drug pusher).

Inisyal kining gibadyetan og P5 milyones ug dugang singko milyones alang niining tuiga. Gawas sa mga reformation center alang drug offenders, nagtukod sab og “Balay Panaghiusa” o reformation center sa misurender kanhi mga rebelde nga giinagurahan niadtong Enero 2021. 

Sa pagkakaron, upat (4) na ka mga pasilidad nga gipadagan og gimentinar sa probinsya ilawom sa pagdumala sa Provincial Social Welfare and Development Office kun PSWDO—Balay Silangan, Balay Panaghiusa, Women Development Center ug Bahay Pag-asa nga kining tulo nahimutang sa lungsod sa New Corella.

Ang Dangerous Drugs Board Regulation Number 2 series of 2018 nagmando sa matag LGU nga magtukod og Balay Silangan alang sa misurender nga drug pusher ug niadtong mipahimulos sa “plea bargaining” nga kahikayan sa korte.