GIKASAKA sa Department of Health (DOH) sa Soccsksargen region ang alerto batok Delta variant. Matud ni Arjohn Gangoso, education and promotional officer sa DOH-12 naghimo og lakang ang ahensiya pinaagi sa pagpakusog sa information dissemination kung paunsa malikayan ang pagtakboy sa Covid-19 sa lawas sa indibidwal.
Tumong niini aron dili na madungagan ang ihap sa 19 ka bag-ong variants nga natala na sa rehiyon. Ang Delta variant ang gituohan nga rason sa pagsaka sa ihap sa impeksyon sa Covid-19 sa nasud India. Ang pagsaka sa alerto sa DOH-12 ang dungan sa pagkatala na sa nasud og kinatibuk-ang 17 ka kaso sa maong virus type.
Kahibaloan nga tungod sa pagsaka sa 5.93% sa attack daily rate sa virus nga miresulta sa pagbutang na sa critical level sa hospital bed capacity sa pipila ka bahin sa rehiyon. Angayan sumala pa nga mosunod ang tanan sa gipatuman nga minimum public health standard batok sa virus. Ang rehiyon ang nakatala og napulo ka B.1.1.7 o United Kingdom variant, upat ka B.1.351 o South African variant. Lakip ang usa ka kaso sa P.1 o Brazilian ug B.1.167 o Indian mutant strains, duha ka kaso sa “variants of concern/mutation with potential clinical significance” ug P.3 or the strain. ( Richel Gubalani)