KALIBO, AKLAN—Gin-engganyo it Department of Health (DOH) 6 do mga local government unit sa Western Visayas nga mas pang pabaskugon do Prevent-Detect-Isolate-Treat-Reintegrate ukon PIDTR strategy eabi eon ag do kaso it COVID-19 sa Region 6 hay padayon nga nagasinaka.
Do nasambit nga stratehiya hay may tinutuyo agud nga indi magkalat do dealdy virus, i-test do mga indibidwal ag komunidad, i-isolate do natumod nga kumpirmadong kaso, buengon ag taw-an it nagakaigo nga pangangalaga sa ikamayad it eawas ag i-reintegrate do mga raya pabalik sa komunidad.
Suno sa DOH 6, do kaso sa rehiyon hay sumaka it 1,000 percent matapos makaeksperensya it pagsaka it kaso it infections do mga probinsya it Iloilo, Capiz, Aklan ag highly urbanized cities kapareho it Bacolod ag Iloilo.
Nasayuran nga maghalin sa 50 daily cases ku nagtaliwan nga buean it Enero, do numero it infections sa rehiyon hay sumaka sa 600 cases kada adlaw makarun nga Hunyo kung siin do sambilog sa mga ginatan-aw nga rasun hay do mga pagpatigayon it mass gatherings.
Kung madumduman, ginakabig it OCTA Research Group do Western Visayas bilang hotspots ku June 9 bangud sa mataas nga daily average number it COVID-19 cases.
As of June 13, 2021, do rehiyon hay nakalista it 55,847 total cases, may 11,712 nga aktibong kaso, 42,832 total recoveries ag 1,285 do binawian it kabuhi matapos iguan it deadly virus. // SHERRY ANNE REUNIR-VIDAL