DOH 6 may iga augment nga vaccination teams sa probinsya para sa 3-day bayanihan bakunahan

Wala sang may kaugalingon nga gin-imponer nga target  ang probinsya sang Negros Occidental para sa pagapatigayunon nga tatlo ka adlaw nga National Vaccination Days sa Disyembre 15 tubtub 17, 2021. 

Sandig kay Provincial Administrator Atty. Rayfrando Diaz II, ila ginahatagan  karon sang pagtamod ang padayon nga kampanya sa radyo kag sa social media sa pagkumbinser sa mga pumuluyo nga magpabakuna. 

Sa karon, suno kay Diaz matalupangdan nag-ayo ang ‘performance’ sang probinsya sa diin pamatuod diri ang zero (0) positive case sa mga quarantine facilities sa syudad sang Silay, Cadiz kag banwa sang EB Magalona.

Ang ‘deployment’ sang mga vaccinations teams para sa tatlo ka adlaw nga Bayanihan Bakunahan halin sa DOH-6 amo ang mga masunod: 2 sa mga syudad sang Kabankalan, Bago kag San Carlos samtang may tig-isa naman ka team ang mga  syudad sang Himamaylan, Sipalay, mga banwa sang Hinigaran, Cauayan, Moises Padilla kag Toboso.