KALIBO, AKLAN—Nagpaguwa it kabilugang Php 2,053,636.38 do Department of Heath para sa COVID-19 Special Risk Allowance (SRA) it mga nabilin nga eligible public health workers sa public hospitals owned and operated it provincial government.
Sa ginpatigayon nga special session it Sangguniang Panlalawigan, gin apruhan do sangka resolution nga nagatao it otoridad kay Provincial Governor Florencio Miraflores agud nga magsueod sa sangka Memorandum of Agreement (MOA) kaibahan do Department of Health (DOH) Central Regional Office VI para nga maipaguwa do nasambit nga pondo.
Ginpahayag man ni Yjhyl De la Cruz, Nurse I sa Provincial Health Office (PHO), nga do DOH-Western Visayas Center for Health Development hay igapapanaog do pondo sa Provincial Government of Aklan agud nga i-cover do grant it COVID-19 SRA para sa May 1, 2021 – June 30, 2021 period.
Kaibahan sa mga pagataeanaan it pondo hay imaw do Ciriaco S. Tirol Hospital (Php 32,272.73); Dr. Rafael S. Tumbokon Memorial Hospital (Php 1,930,454.56); Ibajay District Hospital (Php 71,818.18); ag Malay Municipal Hospital nga may Php 19,090.91.
Ginklaro man ni dela Cruz nga do nasambit nga MOA hay para eamang sa mga public hospitals ag magaobra it separado nga MOA para man sa mga private hospitals sa Aklan.
Samtang, gin-eksplikar man kara nga bukon it tanan nga health workers hay eligible nga magbaton it SRA bangud nga do mga na-exposed eamang sa COVID-19 patients do mga makabaton kara.
Kung madumduman, nag-rally ku nagtaliwan nga buean do pilang nurses it DRSTMH ag ginpaabot do andang hibubun-ot bangud sa owa pagtao sigon sa andang SRA. // SHERRY ANNE REUNIR-VIDAL