LEGAZPI CITY – Nagtao na nin kapaliwanagan an Department of Public Works and Highways (DPWH) Bicol mapadapit sa mga alegasyon sa ahensya na pigrurumpag su boot ninda an mga tinampo maski pa wara man ki raot.
Katakod man ini kan pagkuwestyon kan nagkapirang mga senador sa ahensya huli sa kaparehong isyu.
Sa intrevista kan Brigada News FM Legazpi kay DPWH Bicol Regional Spokesperson Lucy Castañeda, sinabi niya na mahihiling sana kaya na maray sa ibabaw, alagad dai man nahihiling sa irarom.
An saindang ahensya, nagre-repair kan mga tinampo dawa pa nahihiling kan iba na maray pa ini, alagad sa ibabaw man sana su boot ini.
Sa irarom kan mga tinampong ini, igwa nin raot kaya ninda pigrurumpag asin pig-iirahay.
Segun kay Castañeda, kun hahalaton pa ninda na maglala pa an estado kan mga tinampo, mas mapapagastos pa an gobyerno sa pag-ayos kan darakulang problema.
Dugang pa niya, pag-abot man sa kalidad kan piggagaramit nindang semento, igwa sindang pigkokondusir na testing antes gamiton an mga ini.