LEGAZPI CITY – Nagtutubod an Department of Public Works and Highways (DPWH) Bicol na gabos na mga empleyadong job orders (JOs) sa saindang opisina, nakaresibe na ki year-end bonus.
Ini an paninidugan ni DPWH Bicol Regional Spokesperson Lucy Castañeda katakod kan isyung igwa nin mga JOs sainda na dai pa su boot nakakaresibe kaini.
Sa intrevista saiya kan Brigada News FM Legazpi, pigsabi niya igwa nin supisyenteng pondo an saindang opisina kun kaya gabos na mga JOs nagkatarawan na ki year-end bonus.
Segun kay Castañeda, nakumpirmar niya man ini sa mga JOs na igwa na sindang naresibeng PHP3,000.
Dugang pa niya, an makakaresibe sana kan naunambitang bonus iyo an mga uminabot na sa sarong taon na pagigin empleyado sa ahensya.
Mientrastanto, pigklaro man niya na gabos na mga empleyado de gobyerno kaiba an mga JOs, matatawan ki rice allowance susog sarong administrative order kan Malacañang.
Nakua na ninda su boot an mga bagas, alagad pag-abot sa NFA, pinasabay pati na an mga empleyadong nag-retire kaya nagkawsa nin delay o may mga dai tulos natawanan.
Segun saiya, may nagkapira pa kayang mga rekisitos an kaipuhan isumiter siring kan authorization letter, kun kaya nahaloyan an pagdistribwer kan mga bagas.