DPWH, nagtikang na pag-instolar hin mga solar lights ha Tacloban City Bypass Road

Nagtikang na ha pag-instolar hin mga solar street lights ngan solar studs an buhatan han Department of Public Works and Highways (DPWH) ha Tacloban City Bypass Road nga makakabulig mapalamrag an nasabi nga dalan.

Sumala kan DPWH 8 Regional Director Edgar B. Tabacon, nag-alotaga an buhatan maabot P263 million nga budget para ha tulo nga kontrata bahin ha pan-instolar hin solar LED streetlights ngan studs ha nasabi nga 6.4- kilometer bypass road.

Tikang ha total budget allocation ha ilarom han GAA 2023, P65 million an gin-alotaga ha pag-instolar hin solar studs ngan P198 million naman para ha pag–instolar hin solar LED street lights.

Igindugang pa ni Tabacon nga nagpapadayon an lighting project nga nagtikang la dida han nakalabay nga bulan han Mayo agud matagan hin lamrag bypass road tikang dida han Nula-tula village ngan katapusan han Caibaan village.

An Tacloban City Bypass Road in presente gin-aagian han mga motorista nga karuyag la an halipot nga pagbiyahe ngan ha mga karuyag umiskapo ha trapiko ha Maharlika Highway ha siyudad.

Mababaruan nga an paggamit hin solar-powered street lights ha mga public works projects in deri pala nag-iiha nga na-aprobaran kasunod han issuance han Department Order No. 19, series of 2023.

Leave a Reply

Your email address will not be published. Required fields are marked *