Patay ang driver sang habal-habal nga motorsiklo matapos ginhatok-hatok labo sang isa ka mamumugon sa Sitio Sinandigan, Brgy. Mianay, Sigma, Capiz.
Ginkilala ang napatay kay alyas “Crispino”, 47-anyos samtang ang suspek amo si alyas “Jose”, 48-anyos lunsay mga residente sang nasambit nga lugar.
Sandig sa impormasyon nga nakuha sang Brigada News FM Roxas City sa Sigma Municipal Police Station, natabo ang pagpanglabo takna alas 8:00 sang aga kahapon sang Lunes kun sa diin nagsugat-anay ang biktima kag suspek sa dalan.
Nag-angkon ang mga ini sang pagbinaisay nga nagresulta sa pagpanglabo sang suspek sa biktima gamit ang sanduko kag naigo ini sa ulo, liog, abaga kag kamot kun sa diin nautod pa sini ang duha ka tudlo.
Ginpadangat pa ini sa Sigma Rural Health Unit apang ini ang gindeklara ni Dr. Ma. Theresa Tan nga dead on arrival.
Sa karon, yara na sa kustodiya sang Sigma PNP ang suspek kag natalana nga pasakaan sang nagakaigo nga panumbungon samtang ang bangkay sang biktima ang gindala sa isa ka punerarya sa nasambit nga banwa. | Judy Ann Juare