Pilason ang isa 26-anyos nga empleyado sang gobyerno matapos bumunggo ang ginamaneho nga motorsiklo sa Toyota Rush SUV sa Brgy. Sibaguan, Roxas City.
Ginkilala ang napilasan kay John Christian Dave, residente sang Brgy. Poblacion sa banwa sang Sapian.
Samtang ang driver sang Toyota amo si Cherry Mae Azarce, 32-anyos, kaupod sini ang iya pamilya nga sanday Amy Rochella Azarce, 34-anyos; Alma Azarce, 56-anyos; kag Gracia Capurcos, 61-anyos nga lunsay residente sang Block 11, Lot 19 Camella Homes, Brgy. Sibaguan, Roxas City.
Sandig sa imbestigasyon sang Roxas City PNP, samtang ginasubay ni Azarce ang dalan gikan sa Roxas City padulong sa Brgy. Sibaguan, pag-abot sa Camella Home nag-hazard signal ini kag nagpundo sa tunga sang karsada agud hatagan sang tsansa nga maka-agi ang isa ka salakyan nga yara sa pihak nga linya kag pagkatapos nag-left turn ini pasulod sa entrance sang nasambit nga subdivision.
Apang, aksidente nga nabungguan sang motorsiklo ang likod nga porsyon sang salakyan bangud sa madasig nga pagpadalagan ni Dave.
Bangud sa natabo, natumba si Dave kag nag-angkon sa pilas sa magkatuhay nga parte sa iya kalawasan nga madasig naman ginrespondehan sang Roxas City Emergency Response Team kag ginpadangat sa St. Anthony College Hospital para sa pagbulong kag ini ang nagpositibo sa Covid-19 antigent test.
Sa karon, nagapabilin ini sa ospital samtang ang iya motorsiklo ang nakaagom sang damage sa una nga porsyon. | Judy Ann Juare